Последна промена пред 3 часа | Среда 30 Јули 2014 | 0 0

По судови 65 години си го бара имотот што државата му го зела двапати

  • Објавено: 24.01.2014 16:26
  • Прочитано: 877
  • Печати
Весна Дамчевска

Скопјанецот Душко Стојанов секој ден од 10 до 12 часот веќе два месеца протестира пред Врховниот суд. Тој е револтиран од судството, поточно од судијката што ја потпишала последната пресуда во врска со имотот на неговата мајка Трајанка, во процес што почнал пред цели 65 години!

Во далечната 1949 година државата со акт за експропријација ѝ одзела на Трајанка Стојанова 3.440 квадратни метри земјиште зад Тутунскиот комбинат во Скопје и го доделила на „Фабриката за никотин и тутун Скопје“ со намера на нивата да се одгледува тутун. Бидејќи фабриката ништо не правела на земјиштето, Стојанова повела постапка за деекспропријација.

- Законската регулатива налага во одреден рок да почне да се користи експроприраното земјиште. Во спротивно,  може да се поведе постапка за деекспропријација и ние ја искористивме таа можност. Во 1973 година Врховниот суд пресуди дека земјиштето се деекспроприра во корист на Трајанка Стојанова – вели Душко, кој сега ја тера правдата во име на својата 90-годишна мајка.

Иако навидум изгледало дека семејството Стојанови си го вратило земјиштето назад, во меѓувреме, државата уште еднаш го експроприрала истото земјиште. Во 1962 година  со решение на Околиски народен одбор Кисела Вода, ова земјиште се доделило на претпријатието „Јавор“ од Скопје, чиј сегашен правен наследник е компанијата „29 Ноември“.

- Замислете, имотот не е одземен од „Фабриката за тутун и никотин Скопје“ која во 1962 година сѐ уште го поседува земјиштето, туку од мојата мајка. Но, таа никогаш не добила решение за одземање на имотот, па и не можела да реагира дека имотот веќе ѝ е одземен. Тоа решение по многу години излезе на виделина, откако успеавме да си го вратиме земјиштето, но по спор што го водевме за негово одземање во 1947 година – вели Стојанов.

Со многу документи во раце, Стојанов посочува дека неговата мајка има и поседовен лист за земјиштето, а уписот го направила Републичката геодетска управа врз основа на пресудата на Врховниот суд. Така, сега, за истото земјиште сопственици се и Трајанка Стојанова и „29 Ноември“.
 - Всушност, откривме дека по 1962 година во Катастарот паралелно се воделе две парцели. Една со површина од 13.106 метри квадратни, добиена по спојување на повеќе мали парцели вклучувајќи и 2.740 квадратни метри од имотот на мајка ми, и друга,  во која се сите 3.440 квадратни метри од  имотот на мајка ми – објаснува Стојанов.

Во 2011 година семејството Стојанови поведува постапка во Одделението за имотно-правни работи во Кисела Вода за да се поништи решението од 1962 година со кое им е одземено нешто што тогаш и го немале.

- Одделението за имотно-правни работи при Министерството за финансии носи решение со кое се поништува решението од 1962 година, а по 9 месеци, Министерството за финансии бара да се преиспита случајот и си го поништуваат сопственото решение – вели Стојанов.

Тој правдата ја бара и пред Управниот суд, но и таму ја губи битката. Разочарани, како што вели Стојанов, од оваа огромна судска неправда, тие водат и судски спор против „29 Ноември“ затоа што, според нивниот поседовен лист, фирмата незаконски работи на нивното земјиште. Основниот суд во Скопје донесува решение во нивна корист и определува дека „29 Ноември“ треба да им исплати надоместок од 23 милиони денари за незаконско збогатување. Но, фирмата се жали и конечната пресуда од Врховниот суд е во корист на „29 Ноември“. Сопствениците на плацот, за кој водат битка цели 65 години, за сите изгубени судски спорови плаќаат огромни судски трошоци, но велат дека не можат да се помират со тоа што им се случува.

 

(Објавено во Слободен печат) 


Не е дозволено преземање на оваа содржина или на делови од неа без дозвола од редакцијата на Плусинфо.

 

/style/images/posledni.jpg

Последни коментари (вкупно: 0)

Прочитај ги сите коментари:

Напиши коментар:

име:
е-маил:

добивајте известувања за коментарите на маил
порака:

Плусинфо нема да објавува коментари кои содржат говор на омраза, кои дискриминираат по основ на родова, социјална, етничка припадност или сексуална определба, како и коментари кои повикуваат на етничко, верско, расно, национално или политичко насилство и нетолеранција.


ОСТАНАТО ОД РУБРИКАТА
ПОВЕЌЕ >>
За содржини постари од 01.01.2014 погледнете во нашата архива:
arhiva.plusinfo.mk
http://images.plusinfo.mk/commercials/Web-Banner-EVN-Snabduvanje-300x250.gif