БЕЛАТА КУЌА ПЛАНИРАЛА ДА ОБЈАВИ „ЕКОНОМСКА ВЕСТ“ ПО САМИТОТ НА АЛЈАСКА Русија и САД разговарале за соработка во замена за мир во Украина

Белата куќа планирала да објави голема економска вест по неодамнешниот самит меѓу американскиот и рускиот претседател на Алјаска, надевајќи се дека ќе прикаже дипломатски пробив со Русија, изјавил извор за Ројтерс.

– Вака Трамп се чувствува како да постигнал нешто – рекол изворот.

Според написот на медиумот, 5 извори запознаени со преговорите рекле дека американските и руските владини претставници разговарале за неколку енергетски договори и дека преговарачите ги предложиле договорите како стимулации за Кремљ да прифати мир во Украина и за САД да ги ублажат санкциите.

Првично, преговорите се одвивале во Москва за време на посетата на американскиот претставник Стив Виткоф, кој таму се сретнал со рускиот претседател Владимир Путин и со неговиот инвестициски претставник Кирил Дмитриев. Потоа, на 15 август на Алјаска, дел од темите биле дискутирани и на средбата меѓу Путин и Трамп и делегациите на Русија и на САД.

Наводно било предложено американскиот „Ексон Мобил“ повторно да учествува во рускиот нафтен и гасен проект „Сахалин‑1“, кој компанијата го напуштила по почетокот на инвазијата  врз Украина во февруари 2022 година. Се разговарало и за продажба на американска опрема за руските проекти за течниот гас ЛНГ, како „Арктик ЛНГ 2“, кој е под западни санкции. Третата варијанта била САД да купат од Русија нуклеарно‑погонски бродови за кршење мраз.

Трамп и неговиот тим за национална безбедност продолжуваат да се ангажираат со руски и украински претставници за билатерален состанок кој има цел да го запре убивањето и да стави крај на војната.
„Не е во национален интерес јавно да се преговара за овие прашања“ – соопшти Белата куќа.

Портпаролот на главниот руски преговарач за Украина, Кирил Дмитриев одбил да коментира за Ројтерс, а засега нема одговор ниту од компаниите „Ексон Мобил“, „Роснефт“ и „Новатек“.